Գայ Ղազանչյանը ծնվել է 1991 թվականին Երևան քաղաքում (Հայաստան)՝ տոհմիկ նկարիչների ընտանիքում։ Շատ վաղ տարիքից նա ընկղմված էր ծնողների շարունակական ստեղծագործական և ցուցահանդեսային գործունեության մթնոլորտում, ինչը միգուցե և նպաստել է նրան, որ դեռ փոքր տարիքից Գայը ներկայանում է միայն որպես նկարիչ:

Արդեն 16 տարեկանում Գայ Ղազանչյանն ընդունվում է Երևանի գեղարվեստի ակադեմիա, գեղանկարչության ֆակուլտետ։ 2011 թվականին նրա «I KNOW WHERE IT’S FLYING», յուղաներկ, կտավ, 200 x 150 սմ դիպլոմային աշխատանքը արժանանում է Գեղարվեստի ակադեմիայի բարձրագույն պարգևին՝ Էդուարդ Իսաբեկյանի անվան մրցանակին:

2012-ին Գայը Գեղարվեստի ակադեմիայից ուղարկվեց արտ ռեզիդենցիայի “Cité des Art” Փարիզ (Ֆրանսիա), ինչը հզոր խթան հանդիսացավ նրա ստեղծագործական և ցուցահանդեսային գործունեությունը սկսելու համար: Գայի պատկերավոր, մոնումենտալ գեղանկարչական աշխատանքները դինամիկ են և խորհրդավոր։ Թռիչք և ազատություն, շարժման ազատություն, մտքի ազատություն. Սրանք են Գայ Ղազանչանի այդ շրջանի աշխատանքների թեմաները: Գեղանկարչության հետ մեկտեղ Գայը ստեղծում է մի շարք բրոնզե քանդակագործական աշխատանքներ, որոնք առանձնանում են վառ անհատականությամբ և անսովոր թեմատիկայով: Անհատական ցուցահանդեսներ են բացվում ինչպես հայրենի Երևանում, այնպես էլ Վիսբադենում (Գերմանիա), Գրոնինգենում (Հոլանդիա), Ցյուրիխում (Շվեյցարիա), Բեյրութում (Լիբանան): Սկսվում է համագործակցությունը AvestArt պատկերասրահի հետ։

2016 թվականին Գայ Ղազանչյանի գեղանկարչական ստեղծագործությունը՝ “Պատերից դուրս” եռանկարը արժանանում է 2015 թվականի Հայաստանի Հանրապետության Նախագահի երիտասարդական մրցանակին:

2017 թվականին նկարիչը AvestArt պատկերասրահի կուրատորության ներքո Վաշինգտոնի (ԱՄՆ) “Լատելա” պատկերասրահում բացում է “Ճամփորդություն առանց շարժման” անհատական ցուցահանդեսը։ 2019 թվականից Հայաստանի նկարիչների միության անդամ է:

2020 թվականի պատերազմը Լեռնային Ղարաբաղում, մարդկային զոհերը, մշտական կորուստների չդադարող ցավն ու ապագայի անորոշությունը, Գայ Ղազանչյանի ստեղծագործության բոլորովին նոր շրջանի սկիզբը դրեցին:

2021 թվականին Երևանի Ժամանակակից արվեստի թանգարանում տեղի ունեցավ Գայի ստեղծագործությունների մեծ ցուցահանդեսը, որը կրում էր “ԱԿԱՆատես” (վկա) խորագիրը, և բառախաղի պատճառով վերնագիրը կարող է ընկալվել նաև որպես “նա, ով ականներ է տեսել”: Այս շրջանի աշխատանքները արտահայտիչ են և առանձնանում են հատուկ էներգիայով, դրանք տղամարդկանց, ավելի շուտ երիտասարդների պատկերներ են…, դրանք հայացքում սառեցված հարց պարունակող դեմքեր են … Ցուցահանդեսի երկու գեղանկարչական աշխատանք և մեկ քանդակ ընդգրկվել են Ժամանակակից արվեստի թանգարանի մշտական ցուցադրությունում, ինչպես նաև ներառվել են թանգարանի 2022 թվականի պատկերագրքում:

2022 թվականին Գայը ստեղծում է նոր սերնդի գեղեցիկ, երիտասարդ, ինքնավստահ մարդկանց դիմանկարների նոր կենսահաստատ շարք։ «IUVENIS» (երիտասարդություն) նախագծի ցուցահանդեսը տեղի ունեցավ Երևան քաղաքի «Art Kvartal» պատկերասրահի սրահներում:

Ժամանակակից մարդու նոր կերպարի որոնումը շարունակում է մնալ Գայ Ղազանչանի ստեղծագործության հիմնական բաղադրիչը: